محل تبلیغات شما



 

 

 

باخمادین عاشقینه،چاتدی گئنه صُبح، شاما

ای جمالی منِ شیدایه معطّر شاماما

بی وفالیق اوخونی  وورما  بو یانغی  دؤشومه

یئتیشیم  رحم قیل  اوُ  باده ی حُسنونلا  کاما

منده بیر اینسانام  آخیر سنه  بئل  باغلامیشام

باغریمی یارما، هئچ اولمازسا جواب وئر سلاما

یاغماساندا باری  بیر لحظه  گورولده  سئوینیم

یالواراندا، بیری  دیل  یاره سی  وورماز آداما

قلبیمین  شیشه سینه  بالِ مگس  دَه یسه  سینار

نه کی  سن  داشی  گؤتور زیددا  منیم  قابیرقاما

آیاغین اوسته  دؤشَندیکجه  یارام  سیلکه له نیر

قورخورام  سیچرایا  آنجاق، اوره گه  قانی  داما

دادایا  ذرّه  محبّت  ائله  دور سونرا  آپار

بیر عؤمور قلبینی کؤنلونده  یانار عشقه  یاما

 

بهار_1367_هجری_شمسی_دادا

 

 

 

 


 

 

 

يارين  اوزونو   بو گئجه   پيمانه ده   گؤردوم
دونيا  دولو  شادليقلاري   ميخانه ده   گؤردوم
گزديم   نگران  چؤللري   آخيرده    قاييتديم
يورقون  دوشه رك  سئوگولومي خانه ده گؤردوم
چوخلاري   اؤزون   شمعه   مثال  ائتدي   ولي  من
عشقين  اودونا   يانماغي   پروانه ده   گؤردوم
سانما  كي   بو   ديوانه ليگين   آزدي    مقـامي
عقلين   چيچه يين   گلشن ِ  ديوانه ده    گـؤردوم
بو  دونيا   غمين  كؤنلونه   دولدورما   دادا   چوخ
ايچ   باده  كي  من  شَن ليگي  ميخانه ده  گؤردوم

 

دادا بیلوردی

 

 

 


 

 

 

منه بایرامدیر او گون کی…

 

 

گؤزلیـم گل قونـوشاق بیـرگه اورک دن دانیـشاق
سئوگی دن، آرزیـلاریـمدان ، گَـلـه جـک دن دانیشاق

بیــزکی بیـــر عؤمـر بـو زنـدان دا قـالانـلار دَه ییلیک
بـاش ووراق گـولشنه بیـریـولدا چیچک دن دانیشاق

دویغومـوز چــوخ آخـار اولسون سؤزومــوز أن دادلـی
سوسوزا ســو ، آجــا البتــّه چــؤرک دن دانیشاق

قـارغیــلانمیش یئــــری دولـدوردو دومـانـلار دور گَل
تـانـری دان نـور دیـلـه ییب خالقا کؤمک دن دانیشاق

سئوگــی یـوردونـدا دونـان دویـغـولارا بـاش وئــرمه
یـاخشی اولماز گـؤزَلیم ! یـازدا کولک دن دانیشاق

یـانغیــلی قـوْ ل بـویـون اولـمـاق نـه قَـَدَر رؤیـاده ؟!
گل دوداق بیـــر ، اوز اوزه آنـجاق امک دن دانیــشاق

بیـــر قـوجاق شنلیک ایـله کؤکسومو قیوْراق دولاناق
اؤلکه مه شار سالاق ایستکله دیلک دن دانیشاق

قلبیـمی آل الیم اوستوندن آخــار قانیـمی گـؤر
قلم آلتیندا سینان بـاغلــــــی بیلک دن دانیشاق

قافالــــــی ائللـــــریمین قـایـغیـلاریـــن دویـدوقـجا
گـؤز یاشیمدا بـوْغـولان خستـه بَبَک دن دانیشاق

سؤیکه نرکن گونشه عـدل دن آرتیــق سؤز آچـاق
یازیـق اینسانــلارا یـاردیـــم ائـله َمک دن دانیشاق

دونیانین یـوخ یییه سی ظـولم چیخیبدیر عرشه
گل گوناهسیز قـان اودان حوری – ملک دن دانیـشاق

آختـاریب بیــرجـه تـاپـاق گـؤیـده کی بخت اولدوزونـو
عـؤمـرومــه قـوْرا چَکـن چــرخ فلک دن دانــیشاق

هئچ بیلیرسن نهَ یَه خاطیر سنه بئل باغلامیشام؟!
هئچ بیلیرسن نییـه یـالواردیـم اورک دن دانیشاق؟!

ایستیـرم گـوزگو اولام یئــرله شه سن کؤنلومده
حُسنیـوه تـانـری وئـرَن بـوْللو بـه زک دن دانیشاق

منـه بایرامدیـر او گون کی جمالیـن شمعی شـاخا
باغری یانمیش دادا » آدلی کپَهَ نک دن دانـــیشاق

دادا بیلوردی

 

————————–

 

Mənə Bayramdır o gün ki…

Gözəlim gəl qonuşaq bircə ürəkdən danışaq
Sevgidən, Arzılarmdan, Gələcəkdən danışaq

Biz ki bir ömr bu zindanda qalanlar dəyilik
Baş vuraq gülşənə biryolda çiçəkdən danışaq

Duyğumuz çox axar olsun, Sözümüz ən dadlı
Susuza su, Aca əlbəttə çörəkdən danışaq

Qarğılanmış yeri doldurdu dumanlar dur gəl
Tanrıdan nur diləyib, Xalqa koməkdən danışaq

Sevgi yurdunda donan duyğulara baş vermə
Yaxşı olmaz gözəlim yazda küləkdən danışaq!

Yanqılı qol boyun olmaq nə qədər röyadə!?
Gəl dodaq bir, uz uzə Ancaq əməkdən danışaq

Bir qucaq şənlik ilə köksümü qivraq dolanaq
Ölkəmə şar salaq, istəklə əməkdən danışaq

Qəlbimi al, əlim üstündən axan qanımı gör
Qələm altında sınan bağlı biləkdən danışaq

Qafalı ellərimin qayğıların duyduqca
Göz yaşımda boğulan xəstə bəbəkdən danışaq

Söykənərkən günəşə ədldən artıq danışaq
Yazıq insanlara yardım eləməkdən danışaq

Dünyanın yox yiyəsi, zülm çıxıbdır ərşə
Gəl günahsız qan udan Huri, Mələkdən danışaq

Axtarıb bircə tapaq göydəki bəxt ulduzunu
Ömrümə govra çəkən çərxi fələkdən danışaq

Heç bilirsən nəyə xatir sənə bel bağlamışam!?
Heç bilirsən nəyə yalvardım urəkdən danıçaq!?

İstirəm güzgü olam, yerləşəsən könlümdə
Hüsnivə Tanri verən bollu bəzəkdən danışaq

Mənə bayramdır o gün ki cəmalın şəm’i şaxa
Bağrı yanmış Dada Adlı kəpənəkdən danışaq

Dada Bilverdi

 

 

 


 

 

شيطاندان  بــَـتــَـر

 

 

سئير  ائديب  عشقيله  وصلين  ايسته رم  جاندان  بتر

اودلانيب  ياننام  غمين  ايچديكجه  عطشاندان  بتــــر

كؤلگن   آلتيندا  سوروننم  باغلاناركن  زولفونــــــــه

گؤزلرين   جامين   ديله ننم   يانغي   جئيراندان   بتر

نازيني   دويدوقجا  آنجاق  شــوقـدان   تيتره ر  جانيم

ايستي   يئل  قوينوندا   گيسـوي    پـريشاندان   بتـــر

بير آووج  نورون  نه گؤركي  سالدي اينجاردان مني

داغ  دؤشونده  جان  وئـرن   موسيّ  ِ عمــراندان  بتر

باخبـــــــر   اولدو   منيم   مور  و   ملخ ده   حـاليـما

اختيــــاريم   وئـــــرميشم   الـدن    سليمانـدان   بتـــر

ياره مه   نئشتـــر   تكـي   ظاليـم  رقيبين   باخماسـي

يانـديـران   اوددور   سـر ِ  كـويوندا    بهتاندان  بتـر

باغـــــــريما   دؤنـدرميشم    گؤز ياشيمين  وَريانيني

چون  ائـدَر  حاسد   شماتت  گؤرسه   شيطاندان  بتر

ياغــدي   قان   مظلوم   دادانين  روزگاريندان  داهـا

روحونا  سنسيز  اولوب  گـئـن   دونيا  زنداندان  بتر

 

دادا – 1371 هجری شمسی

 

 

 

 


تبلیغات

محل تبلیغات شما

آخرین ارسال ها

آخرین جستجو ها

منتظران ظهور وبلاگ گروه عربی شهرستان بندرگز